Հայ առաքելական եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանը երեկ իր մոտ է հրավիրել Արցախի քաղաքական ուժերի ներկայացուցիչներին ու նախագահի թեկնածուներին: Արցախում նախագահի եւ խորհրդարանի ընտրությունները կայանալու են մարտի 31-ին:

Պարգեւ Սրբազանը հայտարարել է, որ որպես հոգեւոր առաջնորդ իր վրա է վերցնում ընտրությունների հաշտ ու խաղաղ ընթացքի համար պատասխանատվությունը՝ նշելով, որ եթե ինչ-որ մեկը խախտի ազնիվ խաղի կանոնները, անձնական վիրավորանքներ հասցնի, նշանակում է, որ ազգային շահերի դեմ է եւ լուսանցքում է հայտնվելու:

Հանդիպմանը նախագահի թեկնածուներից ներկա չէր Արցախի նախկին վարչապետ Արայիկ Հարությունյանը: Նրա Ազատ հայրենիք կուսակցությունը ներկայացրել է խորհրդարանի փոխխոսնակ Արթուր Թովմասյանը: Դա հատկանշական բացակայություն էր, նկատի ունենալով, որ նա վաղուց նախընտրական արշավ է անցկացնում, ընդ որում թե Արցախում, թե Հայաստանում, չխորշելով ոչ մի մեթոդից:

Օրինակ, պետական պատվերով աշխատող որոշ ձեռնարկությունների աշխատակիցներ ասում են, որ տնօրինությունը հրահանգում է քվեարկել Արայիկ Հարությունյանի օգտին: Մարդկանց փորձում են համոզել, իբր եթե այլ նախագահ լինի, պատվերներ չեն լինի, եւ առանց աշխատանքի կմնան: Լուրեր են տարածում, որ Երեւանն աջակցում է Արայիկ Հարությունյանին եւ միայն նա կարող է ապահովել պատվերները:

Անցած տարվա վերջին Արայիկ Հարությունյանի թիմը փորձում էր ամեն կերպ ապացուցել, որ Երեւանի նախընտրած թեկնածուն հենց Հարությունյանն է: Բանն անգամ հասավ տեղեկության, որ Նիկոլ Փաշինյանն անձամբ է ասել, որ Արայիկ Հարությունյանին գերադասում է մյուսներից:

Բացի այդ, Արայիկ Հարությունյանի Ազատ հայրենիք կուսակցությունը հրապարակայնորեն հերքել է հայկական մամուլում մյուս թեկնածուների դեմ Վահրամ Աթանեսյանի հոդվածների հետ իր կապը:

Արցախում սակայն աստիճանաբար քանդվում է նախկին իշխանության ամենազորության մասին առասպելը, որ կարող է գնել ամեն ինչ ու բոլորին: Սկսվում է մի շրջան, երբ մարդիկ հավատում են ոչ թե ուրիշներին, այլ իրենք իրենց:

Երիտասարդ արցախցիները եւ նոր կուսակցությունները, որոնք ներգրավված չեն կոռուպցիոն սխեմաներում, կոչ են արել չաջակցել այն անձանց ու կուսակցություններին, որոնք խրվել են կոռուպցիայի մեջ եւ վատնել ազգային բարիքները: Նոր կուսակցությունների ներկայացուցիչները պահանջում են հրապարակել այն մարդկանց անունները, որոնք մեծ եկամուտներ են ստանում Արցախում ոսկու արդյունահանումից, փոքր ՀԷԿ-երից, որոնք Քարվաճառում ցամաքեցրել են Թարթառ գետը, Ղարաբաղի Տելեկոմի եւ Արցախբանկի բաժնետերերին:

Նախագահ Բակո Սահակյանը հրապարակայնորեն հեռու է մնում այս կամ այն թեկնածուին աջակցելուց, ավելին, այն, որ ընտրությունների պատասխանատվությունն ստանձնել է Պարգեւ արքեպիսկոպոսը, կարող է վկայել, որ Բակո Սահակյանն արդեն չի համակարգում, եւ «դատելու» հեղինակություն ունի միայն Պարգեւ սրբազանը:

Դժվար թե Պարգեւ Սրբազանը ինչ-որ մեկին պաշտպանի քաղաքական պայքարում: Դրա համար նա ունի բավարար իմաստնություն: Պարգեւ Սրբազանը խոսել է «Խորհրդավոր ընթրիք» նկարի կրկնօրինակի ֆոնին: Ո՞վ է մատնելու այդ համաձայնությունը:

 

lragir.am

 
 
 
Published in Արցախ
Posted On Շաբաթ, 11 Հունվարի 2020 18:02

Հաստատում եմ 2020 թ. Արցախում հեռահաղորդակցության ոլորտում գործող մենաշնորհի վերացման և 2-րդ օպերատոր ունենալու մասին տեղեկատվությունը, որի վերաբերյալ գրառում եմ կատարել ս.թ. նոյեմբերի 8-ին։

Իրոք՝ գործող օպերատորին մինչև 2030 թ. տրված է մենաշնորհ, ինչը չի նշանակում, որ այն չպետք է հաղթահարվի։ Հեռահաղորդակցության ոլորտում գործող մենաշնորհը հաղթահարելու համար անհրաժեշտ է քաղաքական որոշում, որը և կընդունվի 2020 թ. երկրորդ կեսին։

Հանրային ծառայությունները և տնտեսական մրցակցությունը կարգավորող պետական հանձնաժողովը մենաշնորհը վերացնելուց հետո միայն կտեղեկացվի և կներգրավվի աշխատանքներին՝ իր լիազորությունների և պատասխանատվության շրջանակներում։

Հաշվի առնելով Ադրբեջանի ջանքերը՝ խոչընդոտելու Արցախում օտարերկրյա ներդրումները, ինչպես նաև փորձերը՝ հետապնդում իրականացնելու Արցախում տնտեսական գործունեություն ծավալող օտարերկրյա ընկերությունների նկատմամբ, նպատակահարմար չէ ժամանակից շուտ մանրամասն տեղեկություններ հաղորդել պոտենցիալ ներդրողների մասին։

Posted On Հինգշաբթի, 26 Դեկտեմբերի 2019 12:56
Էջ 3, 7-ից

Կայքի հրապարակումների մասնակի կամ ամբողջական օգտագործման ժամանակ հղումը կայքին պարտադիր է: Էլ.փոստ` artsakh1in@gmail.com

Նորություններ

Բաժանորդագրվեք մեր նորություններին: Բաց մի թողեք որևէ նորություն կամ պատմություն:

Մենք սպամ չենք ուղղարկում